De letras e de imaxes nas aulas de Primaria nace das inquedanzas e reflexións de investigadores, vinculados ao grupo LITER21 (GI-1839) e ao Instituto de Ciencias da Educación da Universidade de Santiago de Compostela, sobre o acto cocreador da lectura textual e visual.
Conscientes de que no transcurso da Educación Primaria o alumnado precisa asentar o hábito lector, toman como base fundamental a Literatura Infantil e Xuvenil, entendida como recurso para a amosar como se pode estudar e ensinar que é e como se accede á Literatura.
Desde a dupla óptica da Educación literaria e a Educación artística, ofrécese un variado abano de reflexións que inciden, segundo as súas conviccións, na Literatura Infantil e Xuvenil galega, en competencias e formación; na lectoescritura, reescritura fílmica e creatividade; na aposta pola educación inclusiva e a alfabetización cinematográfica; na reflexión sobre ética e estética; e nas posibilidades didácticas da fraseoloxía, dos Cadernos de Cidade, do Libro de artista, dos cadernos de viaxe e do Kamishibai.