«Nire ustez, liburu hau kondaira beltzari buruzkoa da. Kondaira beltzaren, kondaira beltz guztien inguruko gogoeta da. Ikuspuntu berri bat, ezberdina, itsasoz bestaldean gertatutako pasadizoari buruz oro har ematen denaren oso bestelakoa. Eta uste dut Bartolomé de las Casas objektiboa zela bere azalpenetan. Hala dio, hitzez hitz –aurrean estrategikoki zabaldurik duen liburura jotzen du–: «Traigo aquí una breve descripción de las acciones diabólicas que los españoles cometen a diario en vuestros territorios del Nuevo Mundo...». Beraz, acciones diabólicas. Ezin argiago hitz egin. Eta guk hitza hartuko diogu. Haren ikuspuntua eta lekukotza erabiliko ditugu –udako saioetan idatzitako oharretako bati heldu dio–: Halako hark zioen bezala, nor zen?: «Lo que contó Bartolomé de las Casas, lo sabían de memoria los funcionarios de la Corona y el pueblo lo adivinaba en las narraciones orales...».