Sistema elektroniko digitalak —edo, laburrago esanda, Elektronika digitala— Ingeniaritzako titulazio askotan irakasten dira, eta funtsezkoak dira beste gai asko landu ahal izateko, besteak beste, Konputagailuen arkitektura, Zirkuitu digitalen diseinua eta Komunikazioen elektronika. Ingeniaritzako ikasleek Elektronika digitalaren oinarrizko mailako testuliburu gisa erabil dezaten prestatu da honako liburu hau. Bertan, bi gai uztartzen dira. Batetik, sistema digital guztiek oinarrian duten teoria, eta, bestetik, sistema digital batean oinarrizko funtzioak betetzen dituzten zirkuitu integratuen aurkezpena. Gai guztietan ebatzitako ariketak dauden arren, ariketa horiek kapitulu bakoitzeko kontzeptuak berrikusteko baliabideak dira, eta ez problema konplexuak. Horretarako, hain zuzen, egileek problema-liburu bat prestatu dute: ehun ariketa eta problema baino gehiago ditu, eta horien heren bat ebatzita dago.