Se na historia recente de España e de Galicia hai un período destacable, este é o

da difícil transición democrática, no que o paso ao Estado de dereito resultou posible grazas ao compromiso de xentes como Claudio Movilla. Home dun perfil cultural rico e complexo, labrado con fervor de artesán, de firmes conviccións, exerceu de maxistrado na Coruña, presidiu a Audiencia Territorial de Sevilla e o Tribunal Superior de Xustiza de Cantabria. Foi tamén maxistrado do Tribunal Supremo. Lúcido creador de opinión, non eludiu o risco da expresión crítica, moi alto nese marco institucional e máis en momentos predemocráticos. Así publicou infinidade de artigos en diversos medios de comunicación, sempre sobre temas da máis viva actualidade, non só xudicial, tratados con agudeza e con audacia. Tamén escribiu regularmente en revistas especializadas e foi excelente conferenciante. Militou activamente en Xustiza Democrática, na oposición o franquismo, e en 1984, foi dos promotores de Xuíces para a Democracia, na que tivo sempre un papel relevante. Contribuíu a fundar e presidiu o Ateneo da Coruña.